【《#女鬼橋》短評幾句】
好耐冇出過短評幾句post、更耐冇入過戲院睇恐怖片！作為恐怖片迷，喺Netflix、睇Blu-ray、睇DVD，點都唔及喺戲院睇咁正，呢種感覺久違了！
1. 氣氛確實唔錯，唔少場面都會令你睇到心寒，用鏡亦做到日式泰式鬼片全盛時期個風格，而且唔用Jump scare、單靠畫面營造不安感，獨論氣氛絕對唔差
2. 校園鬼片勝在俾佢幾乎玩轉學校會發生嘅「場景」，廁所、美工房、宿舍、花園、天台、電梯、樓梯等等，尤其電梯樓梯果種「玩法」，係拍得到應有詭異感
3. 事先張揚出人意表，睇你點睇啦，我睇冇耐已經估到兩大twist位。喺度要一讚創作人好有心思去鋪排個「出人意表」位，同時都因為太花心思去鋪，變咗太著跡、好易知道「終極果吓」發生咩事。估唔到應該好震撼、估到就都ok咁啦
4. 少少似《紅衣小女孩》（放心唔似《粽邪》咁揸流攤），都係借都市傳說變成鬼片，但呢套冇兩（三）集《紅衣小女孩》玩得咁複雜，劇情簡單直接再嚟兩個扭橋位，純粹求驚嚇爽快係唔錯嘅
5. 問題係咩呢，故事犯下典型青春恐怖片毛病... 喂明知有事你走啦，仲喺間房度走來走去做乜？廁所一場係拍得出應有恐怖氣氛，但係睇到你會忟。喂大佬呀，正常人搞到咁都走啦，仲同佢癲？
6. 結局似乎有心拍續集，雖然個twist估到，但意念唔差，希望可以好好玩落去，變成另一套《紅衣小女孩》
後記：初試Elements久仰大名THX認證嘅院，唔知係咪試錯戲，冇乜驚喜。最深印象係果句「你說過要保護我的...」幽怨到心寒一寒，有機會搵套大片試吓先... 我知短期內冇。
《紅衣小女孩》相關文章可看留言連結。
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
Search